Мюсемахадана» нябимдей яля’ хэмяхад (сие ниць’ иры’ 10 яляхана) нюдяко ӈацекы’ тохолколава манзара пэяць. Ямальской районхана тарем паднана мале» тет группа.Тикы группа» бригадахана ӈа», хусувэй группахана харта ёльцьмян ӈацекы» тохолку». Маня» группава» харто мюсерта нэнэцие’ поӈгана нерденя тарця группа. Мутрада тарця: хусувэй по’ вэкна тохолкода ӈацекы» ханта», ханяӈыдо’ турта». Мань теда няхар» ӈацекым’ тохоламбидм’ (мяни’ ервха’ ню»), тикы Хасавако (6 пода), Семен (5 пода), Пэдава (3 пода), тад нерня толкодини’ ӈокамда». Хойняна ӈэда нюдяко ӈацекы’ тохолколавахана учитель пэрцида хуркари тохолкода». Пыда тохоламбдида ӈацекыда повнандо’ ӈоб ӈарас ниӈа «, хусувэй ӈацекы харта пиртямда тохоламби.
Маня» тохолколавава» ӈацекы» пон ниня мэлва яӈэ таславы, тарем хусувэй си»ив яляна пыдо’ 5 яляри тохолку», хусувэй яляхана 3 час падна». Хибяри» ханзер тохолкурма’ графикм’ хойхана сертабава’ ня»амна хонаркурцьты». Мань манидам’, мяд’ тер’ ила’ саирт’ сыраць графиква» сертабива», хусувэй яля яӈгня часхана ӈа. Ӈацекыни» хубтыхы 10 час’ пиркана юркорӈа», тохолкованзь яля’ ерь’ пуд турӈа». Тарем тасла тохолковава» 13.00, 15.00 часха’ поӈгана пэӈга. Пудана няхар» яля пихиня хад. Нумда савумахад графиква» несэймандараха.
Хойхана ӈэда нюдяко ӈацекы’ тохолколавахана ӈацекы» етя падвы федеральной, региональной таддикахад харни сертавыни программавна тохоламбин. Ӈоб яӈга таславы ханни’ мюня тохолкована тарана ӈамгэрири», книгари», сянакубцри» ӈа». Тохолкудини няхатато ӈаркадо’ Хасавако луца’ вадам’ хамэдамбида, тянёмбовна лахана пирӈада. Ӈэрё’ няна пыда нулевой классан’ хэванзь мэ. Небяюта’ ихина нюди’ хардахана мэна сита ӈар нита’ поӈгана паднаванда е»эмня таминда нюртей классан’ хэбта тарась. Хойхад товы ӈацекы» нулевой классм’ ёльцемяхадандо’ нюртей классхана мале « 8 подо’ ӈэсьты. Мань ихинани Хасаваком’ нюртей классан’ савовна хамада пиртав’.
Тохоламбада ӈацекэхэнани» ненэй вадавна лаханакурць хорпив’. Етри мультик маниевандо’ нид пыдо’ мале» ӈокавна луца’ вади тенева». Ханяӈэхэна ненэй вадавна сими Альбина нядаби. Табекова пирувна хададо’ тикаркахад ӈани лаханасеты. Мале» сян яля тохолкомана пуд ӈацекыни» паднавамдо’ савуӈадо’. Няхаромдэй яляхана тохолко мэта тольмдо’ харто’ тамба пядунзь», паднабцьидо’, альбомдо’ ӈахакуд хамэдайдунзь».
Едэй тадта»мадара, падвэдра ӈатеда»!
Александра Терехина