Yamal
2015-2016

Ненэй нянэцяӈэ Я мал’ няна невхад иленя ненэця» пыхыдодо’ нюмдеби». Тикы хавна 2015-2016 похона хойхана этнографической экспедиция ӈэӈгу. Нюмда  «Ненэй ненэця″». Проектхана манзарана», тюку сайтм’ манэсарманда хибя» ӈоб’ по’ ёльцянд тыбэрци’ мяд терӈэ ханта». Арктика’ тер» илам’ мюданда манэтадо’.

 

Иле’’мя’ ялэ’ падар’’

Пилё᾽᾽, тудако᾽᾽, хавондир᾽᾽: таӈы серони᾽᾽ тамна тяха вадеяни᾽

Неняӈг᾽᾽ иры᾽ 15 яляна 30 ӈэсына᾽᾽ ян᾽ палӈаваць᾽᾽. Ненадумдмида᾽᾽ ти᾽᾽: N 70º10'21,0'' E 068º09'27,8''. Нензавна мэвэва᾽᾽ 4,5 км. Тикы мюхуня Бованенково-Ухта᾽ газопровод᾽ нимня хаяваць᾽᾽. Тикы газопровод я᾽ ӈылна ӈа, тю᾽᾽уд маниеб лумбад малёмяраха.

Бованенково-Ухта᾽ газопровод᾽ таркаха᾽:

16.07

Газопровод᾽ хэвхана ӈуво᾽ поӈгана хаёвы карьер таня, ненадумдмида᾽᾽ N 70º11'16,9'', E 068º13'17,1''.

Едэй ӈэсына᾽᾽ я Ленгазспецстройм᾽ нюбета манзарани᾽᾽ харад᾽ хэвхана ӈа (Ленгазхад, ӈани нюмдя «нулевой километр», Бованенково-Ухта᾽ газопровод миӈа). Тюкона мюсерта ненеця᾽᾽ Ленгазхана няньдамдо᾽, ӈани ӈаврадамдо᾽ тэмдаби᾽᾽. Харадм᾽ лэтпада вадана тюку та хойхад неней ненэця᾽᾽ ю᾽᾽ ёӈорэй турмы᾽᾽, турта ненэцие᾽ падарт᾽ (журналан᾽) падыбидо᾽. Мани᾽᾽ ихинани᾽᾽ вахтахана манзарана᾽᾽ хойхана иленя ненэцие᾽ ня᾽᾽амна ӈамгэхэртм᾽ ехэра᾽᾽, тарем сырап журналхана ӈобкарт савовна падвы еркар᾽᾽ юӈгу (ибӈод еркарахав᾽᾽ сабе ӈока вуни ӈа᾽᾽).

Маня᾽᾽ ӈэсыхыдана тикы хардан᾽ снегоходхана, ӈэдалё ханӈаць᾽᾽. Маня᾽᾽ ӈани таня яда нэкалӈаваць᾽᾽. Неняӈг᾽᾽ помна ядва нензел вуни ӈа. Ӈавэдана хардан᾽ тэввана᾽᾽ сер сидна᾽᾽ Ярослав Худи᾽ сава ня, Александра᾽ яндер (Татарстанхад товы) Марс сидна᾽᾽ ядабтась. Тикы ненэць ӈани няхата манэкава нэнэй ненэцие᾽ ила᾽ няю᾽ ӈа. Пыда сидна᾽᾽ кофехена, булочкахана ӈавлаванда е᾽᾽эмня савари вадарихина хумбива᾽᾽. 

Ленгазспецстрой᾽ ненадумдама᾽᾽N 70º14'41,8'' E 068º09'29,4''.

Неняӈг᾽᾽ ирыхына хаер᾽᾽ нувода етри таняць᾽᾽. Паддена ты᾽᾽ мято᾽ хэврихина сюраць᾽᾽, ӈопой яхана пон нусеты᾽᾽. Ты᾽᾽ паддева᾽ ёльцеӈгана хасава᾽᾽ малӈэ ты᾽ тяхана мэсеты᾽᾽. Тарем нувандо᾽ сер суюдо᾽ хавомбасеты᾽᾽. Хусувэй мядндер харто᾽ тыто᾽ ненадумдама᾽᾽ таня᾽᾽. Тикы хавондир᾽᾽ таддикахад яхала᾽᾽ма᾽᾽. Ты᾽᾽ тяхана мэна суюмда манэпата нямыбида, тикы᾽ пуд хавомбида. Ханяӈэхэв научной манзаяхана саами᾽᾽ (ӈано᾽ хан᾽᾽) тыдо᾽ савовна хавомбавандо᾽ ня᾽᾽амна толабининзь᾽.  Теда манэць Ямал᾽ тер᾽᾽ тикы няхатато᾽ хаюртадо᾽ юӈгу᾽᾽. Харта тыта хам᾽ хусувэдо᾽ теневада, тикы хавна ненэцие᾽ хавондир᾽᾽ падарт᾽ падыбада᾽᾽. Хавондирсипой ӈэрё᾽ няна ӈамзам᾽ ӈыда ни пират. Тасий маниенида᾽᾽ ӈэсына᾽᾽ тер᾽᾽ хавондир᾽᾽.

Костя Сэротэтто᾽ ха:

IMG 3156

Ӈэсына᾽᾽ тер᾽᾽ ха᾽᾽:

07

Ӈарханда нялемяхаданда тым᾽ яхала᾽᾽мана сидя хэвхаданда ненадумда пирты. Ненэць хавондирта сита пэртя нюдя хасава нюхунда хаврамбида. Маня᾽᾽ Костява᾽᾽ тарем нисянда хам᾽ мэӈа, ӈарка хасава нида харто᾽ хаводо᾽ нисяндо᾽ хам᾽ ненсэймдахая сертавыдо᾽.

Тына᾽᾽ ӈархандо᾽ няле᾽᾽, тадри панэдава᾽᾽, мальцядва᾽᾽ хадаба пяӈгува᾽᾽.  Тыбэрти᾽᾽ вадана нара ты᾽᾽ мал ӈоб толас᾽᾽, та пинкабты᾽᾽, нэлорта᾽᾽. Тедав нялемяхадандо᾽ ненэй тарто᾽ сермам᾽ ханзерць пирты.

Хасавако ӈаябарӈа:

IMG 3372

Неняӈг᾽᾽ иры᾽ 21 яляна 31 ӈэсына᾽᾽ ян᾽ палӈаваць᾽᾽. Ненадумдмида᾽᾽ ти᾽᾽: N 70º11'19,3'' E 068º04'09,1''. Нензавна мэвэва᾽᾽ 3,8 км. Тюку яхана ӈэсыхыдана Мянгча тэраӈгурӈась. Мани᾽ ва᾽᾽авни᾽ няю Хасавако тось.

Ӈэсына᾽᾽ тер᾽᾽ вадавна тюку по неняӈг᾽᾽ ӈани похо᾽ манэць тянёсь. Мани᾽ нянавани ёльце ӈока толхаць᾽᾽. Неняӈг᾽᾽ хавна ниберё᾽᾽, пилё᾽᾽ ӈадимяць᾽᾽. Пилё᾽᾽ иры᾽ неняӈг᾽᾽ иры᾽ пуданахад пэӈга.

Пилё᾽᾽ сидя тэнзадо᾽: ненэй пилё, сяну᾽ пилё. Ненэй пилё᾽᾽ (ты᾽ пилё᾽᾽) ты᾽ тар᾽ ниня нюду хамдамби᾽᾽. Тарем хаевыдо᾽ сибяӈэ ханӈа᾽᾽. Сибясавэй тым᾽ маханда᾽ нимня нямзьлеб лоӈгсавэйӈэ со᾽᾽. Нара᾽ няна, ты᾽᾽ ниць ирыхыд, хоба᾽ пиняю ӈадиберӈа᾽᾽. Тикад пилёӈэ ханӈа᾽᾽. XXвек᾽ нерденяд ненэй ненеця᾽᾽ тыдо᾽ пилё᾽ пардонхана пэраць пяйдонзь᾽᾽. Хурка ӈэбта ӈод  малӈэ яӈгава серта юӈгунив. Яӈгавдавэй хаёвы ты᾽᾽сибят ᾽᾽ хась пиртадо᾽. Сибясавэй ты᾽ хоба᾽᾽ нюдяко сисавэй᾽᾽, тиканда᾽ нид еяӈэ сертаб подаӈга᾽᾽. Тянюмдемба пилё᾽᾽ хадерпада᾽᾽. Сэр хоба ты᾽᾽ хэван᾽ лехэбтамбада, тикан᾽ ӈамдорта᾽᾽ пилё᾽᾽ пяхана хутдамбада᾽᾽. Пилё᾽᾽ тарем хадабавам᾽ ӈацекы᾽᾽ ёльце харвобтадо᾽. Яляна мале сян ёӈорэй хобдо᾽ нюдерць ты᾽᾽ няна ханцеты᾽᾽.

Сяну᾽ пилё᾽᾽ ненэй пилёт тамна пинкабты᾽᾽. Нюдо ты᾽ пыя᾽ сивня ӈэдабтамбидо᾽. Тикыдо᾽ ты᾽ сё᾽ мю хаморӈа᾽᾽, таняна иле᾽᾽. Яӈгавдавэй ӈэбта сяну᾽ пилё᾽᾽ нюхуд ты хась пиртада. Ӈахат (тедаӈо тарця сер᾽᾽ ӈани таняраха᾽᾽) сяну᾽ пилё᾽᾽ ню᾽᾽ хаврамба ты᾽ пыя᾽ сивня, ня᾽ сивня сярхана вабтпавыдо᾽.

Сата епдяхана хойхана пур᾽᾽ сертаби᾽᾽. Ӈоб неняӈг᾽᾽ яляна маня᾽᾽ сидя пурм᾽ пятабиваць᾽᾽.

Пурдо᾽ сертабива᾽᾽:

IMG 3401

Ярославха᾽ Майяха᾽ ӈавка неняӈгахат ервхаюта᾽ мят тюӈга:

IMG 3261

Не᾽᾽ надорӈа᾽᾽, сэдора пэяд᾽᾽. Александра ӈоб тарем нерденя хобамда наӈась.

Аля хобамда пидерцьӈгана (мэятабцьӈгана) мэядамбида:

IMG 3090

Ёльцендо᾽ таль ты᾽᾽ мэнена тудако᾽᾽ ӈадиберць пэяд᾽᾽. Ӈока ӈэда яхананда тудакута ты᾽᾽ хад сэвдарев пыдабтаӈга᾽᾽. Ханяӈы малкурта᾽᾽ пи᾽ ёльцеӈгана ханодо᾽ подерпа пя᾽᾽. Луци᾽ харвобтана ӈавар᾽᾽ - тудако᾽᾽ -  хойхана нидо᾽ ӈорас᾽᾽. Ненэй ненэцяӈгана тикы ты᾽᾽ ӈавар᾽᾽. Мани теневанани᾽ тудако᾽ тэнзхат сыроежка᾽᾽, подберезовик᾽᾽ сэван᾽ хаморӈаць᾽᾽. 

Неняӈг᾽᾽ иры᾽ 27 яляна 32 ӈэсына ян᾽ палӈаваць᾽᾽. Ненадумдмида᾽᾽ ти᾽᾽: N 70º10'42,7'' E 067º56'46,1''. Нензавна мэвэва᾽᾽ 4,8 км.

Тюку яхадана запад᾽ няри мюсеваць᾽᾽. Тэраӈгуромахадана᾽᾽ Юмбыды яха᾽ няю мюсе пэӈгуна᾽᾽. Морды яхам᾽ хаврахая, Альбина᾽ мядндер᾽᾽ ӈамдулаван᾽ пяӈгува᾽᾽.

Пилё᾽᾽ иры᾽ пудана – вэба᾽᾽ иры᾽ нерденя᾽ пиркана серони᾽ сертаванзь лакри Салехардан᾽ тутани᾽. Та᾽ ёльцеӈгана ӈокамбой тадта᾽᾽мадамда, видеодамда манэлабта пиртаниНина᾽᾽ эфирхана манэтынама᾽᾽.

Комментировать Читать полностью

2015 по᾽неняӈг᾽᾽ иры: тамдая ӈэсовы мя, мор᾽᾽ маламбава, хэбидя я

Сава някуцини᾽᾽, ӈани᾽ торовов! Тидари тари ӈамгэ᾽ мян тадта᾽᾽ма᾽᾽ ня᾽᾽анда манэманзь ӈэдабтамбини᾽. Ӈокамбовна вэба᾽ иры᾽ нерняна  Салехардахана мэвани᾽ сер ӈэдабтаванзь пэрӈани᾽.

Неняӈг᾽᾽иры᾽ 11 яляна 29 ӈэсына᾽᾽ян палӈаваць᾽᾽. Ненадумдмида᾽᾽ ти᾽᾽: N 70º09'26,8'' E 068º16'45,2''. Нензавна мэвэва᾽᾽ 5 км. Нид ямдана няна᾽᾽ Владимир Худи᾽ мя ӈэсысь. Таремгав тахалада тыда ӈана няна᾽᾽ ӈомыць᾽᾽. Хахаяда похона тикы ненэць тыда вули тянюмы᾽᾽. Тикы᾽нид мято᾽ӈопой яхана понкая палёвы. Мюхуня ӈани ненэциедо᾽ яда тэворӈа᾽᾽. Владимир᾽ хасава ню Алеша снегоходм᾽ мэць мюсе.

Маня᾽᾽ тет мяма᾽᾽:

IMG 3148

29 ӈэсына᾽᾽ яхад 2 км᾽ пират Ялепя суты’ хэбидя я ӈа. Тикы ненадумдавдавэй ям᾽ манэманзь Александр Сергей Худи᾽ ня ханӈаханзь. Ӈахат манэмы хэбидя ёни᾽ тотрев Ялепя суты᾽ хэбидя яхана ӈобт ӈонавы нямд᾽᾽ ӈа᾽᾽, хэвхананда хан᾽ тахарома᾽᾽ таня᾽᾽. Ханзер᾽᾽ хэбядя яӈэ хэвамда няни᾽ хибярт нидась вадес. Хахаяда яляна тикан᾽ тэвормы ненэця яӈгода толха. 

Ялепя суты᾽ хэбидя я:

IMG 3126

(нажмите "Читать полностью")

 

Комментировать Читать полностью

Тынзям’ паӈгалпава

Сянхав таӈы манзаи’ ня’’амна мале лаханакурӈаваць’’ (тикы надорма, хан, тюр’ мимбава). Теда Костя’ мяӈг Мянгча тёняӈы Ярик тотрев тынзям’ паӈгалпа ӈамды. Александра тарця серм видеон серта тасладась. Тасий видеороликхана ханзер тынзям сертабавам манэтада’’

Подготовка сырья для тынзяна

Тарта савовна хамва е’’эмня хоба нялиртембада, тикы пуд ябтакаковна (1 см пирувна) ерпада. Ӈопой тынзян 80 тибя пир тара.

 

Вэлчой тынзяса’’тыравандое’’эмнятерсядахантяха нэкалпада. Маня’’хобава ӈопойяля тыранась. Тырамахадандо тикы са сомбовна салмрамбада’’, сертавы видеона Мянгча тынзянда са’’ тари еръядась, салмрайдась.  Тикы пуд тет савна паӈгалманда, сармикадаванда. Паӈгалмы тынзя мир’’ 15 ёнарӈэ харва (ханяӈэхэна ёльце савовна сертавы, пирдыраць мэта тынзя 20 ёнар мянм мирета).

Мянгча тынзям паӈгалпи:

IMG 2837

Аляха Мянгчаха тынзя са’’ ерпихи:

(нажмите "Читать полностью")

Комментировать Читать полностью

Таӈы илма’’: неняӈг’’, «янямд’ хабця»

Итя ӈабтеня, Бованенково ня’’амна ӈэдалёромахадани мюсерта няхани’’ саво иры 25 яляна тэвыни. Мани яӈгодахани пыдо 2 яӈорэй ямдавыд’’. Тюку мядона’’ ӈэсь 24 ӈэсына я. Ненадумдмида’’N 70º02'09,0'' E 068º36'11,0''. Сидя мюхуна нензавна мэвы 9,5 км пир.

Неняӈг ирым ниданда манэӈами. Неняӈг’’ пэрця ты’’ ӈопой мандалӈэ хэхэя мято хэвхана сюра’’. Малкуртава’’ ӈопой ненэць, тыда яда пэръяда. 

 

Неняӈг ирыхына паддена тына’’:

IMG 2774

IMG 2778

(нажмите "Читать полностью")

Комментировать Читать полностью

Неняӈг᾽᾽ иры: мядонди᾽᾽, неняӈг᾽᾽, ӈавар᾽᾽ ня᾽᾽амна

Нерде няна толаӈгода няхана᾽᾽ та᾽ ёльцеӈгана хойхы ила хамзкабтавам᾽ манэлабтаван харвани᾽. Тасий тадта᾽᾽мана маниенара᾽᾽ 27 ӈэсына᾽ я.:

IMG 2888

Ӈэсына᾽ я ненадумдама᾽᾽ ти᾽᾽ N 70º06'45,9'' E 068º27'17,5'' . Мядыхы яхадана нензавна мэвэва᾽᾽ 3,1 км пир.

Яранзя᾽ ӈамдэд᾽᾽:

IMG 2890 

Тарензя᾽ поӈгана нуна мюд᾽᾽:

(нажмите "Читать полностью")

Комментировать Читать полностью

Падвы’’

Видео’’

Тюкона экспедицияхана сертавы видео’’ ӈэӈгу’’. По’ ямбан видео’’ тикан’ паклембаӈгуни’. Мани’ ихинани’ ненэй ненэцие’ илам’ савовна падаӈгуми’: по’ ямбан хусувэй яля хойхана ӈамгэм пэрмамдо, ханзер мюсермамдо видеона манэтыда’’. Теневаванда е’’эмня мани’ саць савовна тохолавы (профессиональной) операторни вунини’ ӈа’.

Хоян’ хэсь хамековани мальӈгана , видеон’ падувнда ӈамгэ’’ таслайнинзь’. Хурка ӈэбта ӈоб, сайтан’ сырманда хибя’’ няни’ етри лаханада’’, табекодми вадеӈада’’, паднада’’.

Манзарана’’

Нядаӈгода’’